Мадриднинг «Атлетико» клуби бош мураббийи Диего Симеоне Бильбаонинг «Атлетик» жамоасига қарши ўйиндан сўнг матбуот билан мулоқот қилди. «Матрасчилар» сафарда 0:3 ҳисобида мағлуб бўлди.

«Ўйин сиз кўрганингиздек кечди. Биринчи бўлимни яхши ўтказдик, аммо кейин икки дақиқа давомида концентрацияни йўқотдик ва бир нечта эпизодларда тўғри ҳаракат қила олмадик. «Атлетик» бу ҳолатдан фойдаланди ва ҳақли равишда ғалаба қозонди», — дея Симеоненинг сўзларини Marca келтирмоқда.

«Мураббийлар штаби футболчиларга майдонда нима қилиш кераклигини тўлиқ етказа олмади. Биз ҳали жамоа қураяпмиз. Олдимизда қийин вазиятлар бўлади ва улардан ўтишимизга тўғри келади.

Ўйинни яхши бошлагандик, аммо ўша икки дақиқа биз учун жуда қаттиқ зарба бўлди. Энди бунга тўғри реакция қилишимиз керак.

Хулианнинг вазиятини ҳисобга олмасак, бизда аниқ голли имкониятлар деярли бўлмади. «Атлетик» эса юқори ўринлар учун курашадиган жамоа», — деди Симеоне.

«Атлетико» 7 очко билан 6-ўринда, «Атлетик» эса 4 очко билан 8-поғонада бормоқда.