"Насаф" ва "Бунёдкор" иштирокида "Пахтакор" стадионида, тахминан 3-4 минг мухлис гувоҳлигида ўтган Ўзбекистон кубогининг финал баҳси бир мунча қизиқарли ва курашларга бой бўлди.

"Бунёдкор" ўйиннинг 2-дақиқасидаёқ ҳисобни очиши мумкин эди. Лутфулла Тўраев ўнг қанотдан Сардор Рашидовни олдинга бошлади. Ёш футболчи қарама-қарши устун ёнида очилган Пишурга узатиш ўрнига орқароққа етказишга қарор қилди. Тараннинг оёғи тўпга аранг етдию, тўп Пишурга бориб тушди. Украиналик ҳужумчининг яқин масофадан берган зарбасини эса Элдор Суюнов қайтарди. Боз устига, Олександр офсайдда қолиб кетганди.

Орадан беш дақиқа ўтиб қаршиликлар хавфли жавоб ҳужуми билан жавоб беришди. Ўнг қанотда Геворкян етказиб берган тўпга Фаррух Сайфиев бош билан зарба берди, бироз зарбага бироз аниқлик етишмади. Пишурнинг бурчакдан етказилган тўпга бош билан берган зарбаси ҳам худди шундай траектория ҳосил қилди.

15-дақиқада "қалдирғочлар" омад туфайли ўз дарвозаларидан гол олиб чиқишмади. Ўнг қанотдан марказга кўчган ҳолда Геворкян дарвоза томон зарба берди, тўп эса ҳимоячилардан бирига тегиб ортга қайтди. Фаррух Сайфиевнинг 20 метрлардан берган зарбасидан сўнг эса тўп дарвоза устунига тегиб ён томонга кетди. 28-дақиқада эса "Насаф"ни голдан дарвозабон қутқариб қолди. Қанотдан Ҳасанов етказиб берган тўпни Пишур бош билан орқага қолдирди. Тўраевнинг зарбаси эса кучли чиқдию, Элдорбек ҳам хушёрликни йўқотмаганди.

Умуман ўйин давомида,  Бердиев шогирдлари тўпни назорат қилишга интилишган бўлса, "Бунёдкор" тўпни эгаллаши билан тезкор қарши ҳужум уюштириш пайида бўлди. Бунда қанот ярим ҳимоячилари Ҳасанов ва Рашидовнинг тезкорлигига таянилди. Бу икки футболчига сўнгги узатмани етказишда аниқлик етишмади. 

Иккинчи бўлим ҳам тенгкурашлар остида бошланди. 52-дақиқада бурчакдан етказиб берилган тўпни Олександр Пишур бош билан тўпни дарвозага жойлаб қўйди. Бу вазиятда қаршилик посбон тўпга чиқмай, хатога йўл қўйди.

Шундоғам ўйин давомида кўпроқ қарши ҳужумга эътибор қаратаётган Қосимов шогирдлари голдан кейин бундай ҳужумлар учун янада кўпроқ имкониятларга эга бўла бошлашди. Жасур Ҳасановнинг олис масофадан кучли зарбаси натижасида дарвозабон "сейв" кўрсатишга муваффақ бўлди.

Позоцион ҳужумлардан самара чиқара олмаган қаршиликлар олис масофадан зарба йўллаб, ҳисобни тенглаштиришди. Илҳом Суюновнинг 25 метрлардан тепган тўпи дарвоза бурчагига бориб тушди.

Голдан кейин "Насаф" руҳланиб кетди. 76-дақиқада Бердиев шогирдлари жуда чиройли ва хавфли ҳужум уюштиришди. Бойдуллаев - Қораев - Геворкян комбинациясидан кейин Артурнинг бош билан берган зарбаси дарвоза устуни ёнгинасидан ўтиб кетди. Орадан бир дақиқа ўтиб эса Жасур Ҳасанов 20 метрлардан кучли зарба билан қаршиликларнинг ҳужумига жавоб берди. Бироз ноаниқ.

Ўйин тугашига 4 дақиқа қолганида "Бунёдкор"нинг қарши ҳужуми ва Ҳасановнинг тезкорлиги "қалдирғочлар"га наф келтирди. Жасур тўпни деярли чизиқ устидан орқага — Пишурга етказиб бера олди. Украиналик форвард эса кучли зарба билан Суюновнинг яқин бурчагини аниқ нишонга олди. Дарвоқе, ярим финалнинг жавоб ўйинида "Локо" дарвозасига 2та гол урган Пишур, финалда ҳам "дубл"га эришиб, нафақат ўйин, балки Ўзбекистон кубоги мусобақаси қаҳрамонига айланди.

"Насаф" асосий вақтнинг қолган дақиқаларида хавфли вазият ярата олмаган бўлса-да, Эрматов томонидан қўшиб берилган 5 дақиқанинг учинчисида дарвоза томон зарба бера олди. Зухуров тўпни майдон ташқарисига чиқариб юборди.

Шундай қилиб, "Бунёдкор" тўртинчи марта Ўзбекистон кубогини қўлга киритган бўлса, "Насаф" тўртинчи маротаба финалда имкониятни бой берди.  

ЎЗБЕКИСТОН КУБОГИ, ФИНАЛ
"НАСАФ" - "БУНЁДКОР" - 1:2 (0:1)
Гол: Илҳом Юнусов (63) — Олександр Пишур (52, 86)
Огоҳлантиришлар: Илҳом Юнусов 55), Ҳамза Каримов (57) — Анвар Ғофуров (38), Жавлон Иброҳимов (49), Хайрулла Каримов (65)
"Насаф": 25. Элдор Суюнов, 5. Ботир Қораев, 9. Илҳом Шомуродов, 14. Лазиз Убайдуллаев (Шуҳрат Муҳаммадиев 59), 17. Артур Геворкян (С), 20. Эркин Бойдуллаев, 23. Шерзод Аъзамов, 27. Илҳом Юнусов, 32. Ҳамза Каримов, 34. Фаррух Сайфиев, 41. Азамат Алланиёзов (Зоҳид Абдуллаев 90)
Захира: 1. Михаил Наумов, 3. Раҳматулла Бердимуродов, 15. Зоҳид Абдуллаев, 28. Шуҳрат Муҳаммадиев, 29. Улуғбек Дадабоев, 77. Суҳроб Неъматов, 88. Самандар Шодмонов
"Бунёдкор": 25. Мурод Зуҳуров, 2. Акмал Шораҳмедов, 4. Хайрулла Каримов (С), 6. Анвар Ғофуров, 8. Жавлон Иброҳимов, 9. Игорь Таран (7.Марко Блажич 66), 11. Олександр Пишур, 13. Лутфулла Тўраев (Дилшод Жўраев 87), 16. Артём Флипосян, 19. Жасур Ҳасанов, 21. Сардор Рашидов (14.Алибобо Раҳматуллаев 78)
Захира: 45. Акбар Тўраев, 5. Дилшод Жўраев, 7. Марко Блажич, 14. Алибобо Раҳматуллаев, 23. Саҳоб Жўраев, 29. Анвар Бердиев, 33. Олег Зотеев.
Ҳакамлар: Р.Эрматов, А.Расулов, Ж.Саидов, Ҳ.Рўзиев
Назоратчи: А.Абдуллаев