Мадрид шаҳар кенгаши "Реал"нинг спорт шаҳарчаси атрофидаги 448 минг квадрат метр ер майдони мақомини ўзгартиришни маъқуллади. Бу қарор клубга тегишли Валдебебасдаги ерлар қийматини сезиларли ошириши мумкин.
Ҳозир спорт мақсадлари учун мўлжалланган ушбу ерлар тахминан 70 миллион еврога баҳоланади. Ерлар даромад келтирувчи қурилиш майдони мақомини олгач, уларнинг қиймати қарийб 360 миллион еврогача етиши мумкин. Бу эса тахминан 290 миллион евролик қўшимча қиймат дегани.
Бироқ бу сумма дарҳол "Реал" ҳисоботларида 290 миллион евро фойда ёки соф активлар ўсиши сифатида акс этмайди. Клуб ушбу қийматдан амалда фойдаланиши учун ерни сотиши ёки хусусий компаниялар билан ҳамкорликда лойиҳаларни амалга ошириши керак бўлади.
Мадрид мэри Хосе Луис Мартинес-Алмейда илгари сурган лойиҳа доирасида ушбу ҳудудда меҳмонхоналар, шифохоналар ва офис бинолари қуришга рухсат берилиши мумкин.
Алмейданинг таъкидлашича, лойиҳа фақат "Реал"га эмас, балки бутун шаҳарга фойда келтиради. Хусусан, янги яшил ҳудудлар ва жамоат объектлари барпо этилиши режалаштирилган.
Лойиҳа Валдебебас ҳудудини кенг кўламли қайта ривожлантириш дастурининг бир қисми ҳисобланади. Бу ерда Европадаги энг йирик савдо маркази бўлиши айтилган мажмуа ҳам қурилиши кутилмоқда. Ҳудуд "Реал" ҳомийларидан бири бўлган янги "Формула-1" трассасига ҳам яқин жойлашган.
"Реал" лойиҳадан тезкор молиявий даромад кутмаяпти. Барча сиёсий ва шаҳарсозлик жараёнлари муваффақиятли якунланган тақдирда ҳам қурилиш ишлари энг камида 2030-йилларнинг охиригача тугалланмаслиги мумкин.
Хабарларга кўра, клуб ушбу лойиҳа кейинги 40 йил давомида тахминан 300 миллион евро даромад келтириши мумкин деб ҳисобламоқда. Бошқа вариант сифатида қиймати ошган активларнинг бир қисмини сотиш клубга тезроқ молиявий фойда келтириши мумкин.
Шу билан бирга, режа маҳаллий аҳоли орасида қаршиликка ҳам учради. Фуқаролар сентябрь ойи давомида расмий эътирозларини тақдим этишга тайёрланмоқда.
Уларнинг таъкидлашича, ҳудудда ўрта мактаб, спорт маркази, кутубхона ва тиббиёт муассасаси каби асосий жамоат инфратузилмаси етишмайди. Шу боис, биринчи навбатда ана шу эҳтиёжларга эътибор қаратилиши керак.
Кармен исмли маҳаллий фуқаро туристик турар жойларга урғу берилаётганини танқид қилиб, вақтинчалик туристик апартаментлар ҳақиқий маҳалла шаклланишига ёрдам бермаслигини айтган.
Мухолифат ҳам лойиҳани кескин танқид қилмоқда. Mas Madrid вакили Сара Ладра уни "йирик молиявий имтиёз" деб атаб, бу амалиёт "Реал"га катта совға бўлишини ва давлат бюджетига йилига 25 миллион еврога тушиши мумкинлигини даъво қилган.
Ладра ушбу қарорни Флорентино Перес билан боғлиқ айрим муваффақиятсиз лойиҳалар, жумладан "Сантьяго Бернабеу"даги концертлар ва автотураргоҳлар атрофидаги баҳсларга компенсация сифатида ҳам талқин қилган.
Мануэла Кармена маъмурияти даврида Мадрид шаҳар кенгашининг мулк масалалари бўйича раҳбари бўлган иқтисодчи Карлос Санчес ҳам лойиҳага қарши чиқмоқда.
Санчес аввал шаҳар ҳокимиятида ишлаган пайтида ушбу лойиҳа билан шуғулланган ва уни рад этган. Унинг фикрича, ер мақомини ўзгартириш хусусий ташкилотга давлат ёрдами сифатида баҳоланиши мумкин.
У масалани кўриб чиқиш учун Европа парламентига ҳам олиб чиққан. Санчеснинг таъкидлашича, қайта режалаштириш етарлича асосланмаган, чунки Мадридда шифохона, офис ва меҳмонхоналар қуриш учун фойдаланилмаётган катта ер майдонлари аллақачон мавжуд.
Санчес, шунингдек, сўнгги 50 йилда шунга ўхшаш давлат билан боғлиқ операциялардан "Реал" бошқа клубларга нисбатан кўпроқ манфаат кўрганини, жумладан "Барселона"га нисбатан тўрт баробар кўп маблағ олганини даъво қилган.
