Ўзбекистон миллий терма жамоаси ЖЧ-2014 плей-офф босқичида Иорданияга иккита ўйиндан кейин ўтказилган пенальтилар сериясида имкониятни бой бериб қўйганидан хабарингиз бор. "Лоторея"да томонлар 10тадан зарбани ижро этишди ва иорданиялик дарвозабон Амир Шафий Анзур Исмоиловнинг зарбасини қайтарганидан кейин Ҳуссам Ҳассан шогирдлари 9:8 ҳисобида ғалабани илиб кетишди.

Шафий бундан 9 йил аввал Хитойда бўлиб ўтган Осиё кубогининг чорак финалида Японияга қарши ўйинда ҳам пенальтилар сериясида дарвозани қўриқлаганди. Ўшанда японлар ғолиб чиқиб, ярим финалга йўл олишганди.

ФИФА сайтига интервью бераркан, Иорданиянинг 1-рақамли дарвозабони ушбу ҳолатларни ёдга олди.

"Терма жамоадаги фаолиятимнинг бошидаёқ пенальтилар сериясига дуч келганим ақлбовар  қилмас иш эди. Орадан 9 йил ўтиб шундай муаммога дуч келдим. Шунга қарамай, бу сафар мен ўзимга ишондим. Шунчаки ғалаба ҳақида ўйладим. Ўзбекистон ўзининг биринчи зарбасидан гол ура олмаганидан кейин ғалаба биз томонда бўлиши кераклиги ҳақида ўйлай бошладим", дейди посбон.

Амалга оширилган бештадан зарбадан кейин ҳисоб тенг эди. Шафий ўзини йўқотиб қўймагани боис, ундаги ишонч жамоадошларига ҳам ўтди.

"Ғалаба учун битта зарбани қайтаришим керак эди. Тўп ёнига Ўзбекистон терма жамоаси футболчиси Анзур Исмоилов яқинлашганида, мен ўнг томонга ташланишга қарор қилдим. Бу тўғри қарор бўлиб чиқди. Ғалабамиздан ҳайратландим. Биз кейинги босқичга йўл олдик. Шунингдек, пенальтилар серияси якунланганидан хурсанд бўлдим. Лекин орзуимизни рўёбга чиқариш учун энг қийини ҳали олдинда", дейди Амир Шафий.