2027 йил Хитойда ўтказиладиган U-20 Осиё кубогининг финал босқичида иштирок этадиган барча 16 та терма жамоа номи маълум бўлди. Саралаш баҳслари 6 сентябрь куни якунланди.

Ўзбекистон U-20 терма жамоаси "B" гуруҳида учала учрашувда ҳам ғалаба қозониб, биринчи ўрин билан тўғридан-тўғри Осиё кубоги йўлланмасини қўлга киритди. Жамолиддин Раҳматуллаев шогирдлари сўнгги турда Сурияни 3:0 ҳисобида мағлуб этди ва саралашни максимал натижа билан якунлади.

Гуруҳ ғолиблари сифатида Жанубий Корея, Ўзбекистон, КХДР, Тожикистон, Саудия Арабистони, Ироқ, Япония ва Индонезия финал босқичига чиқди. Мезбон Хитой эса мусобақада тўғридан-тўғри иштирок этади.

Шунингдек, энг яхши иккинчи ўрин соҳиблари орасидан Ливан, Ҳиндистон, Эрон, Иордания, Уммон, Таиланд ва Малайзия ҳам йўлланмани қўлга киритди.

Шу тариқа, Хитойда Осиё чемпионлиги учун курашадиган 16 жамоа таркиби тўлиқ шаклланди. Ўзбекистон ёшлар терма жамоаси эса U-20 Осиё кубогининг финал босқичида кетма-кет учинчи марта иштирок этади. Турнир 24 мартдан 1 апрелга қадар ўтказилади.