2027 yil Xitoyda o‘tkaziladigan U-20 Osiyo kubogining final bosqichida ishtirok etadigan barcha 16 ta terma jamoa nomi ma’lum bo‘ldi. Saralash bahslari 6 sentyabr kuni yakunlandi.

O‘zbekiston U-20 terma jamoasi "B" guruhida uchala uchrashuvda ham g‘alaba qozonib, birinchi o‘rin bilan to‘g‘ridan-to‘g‘ri Osiyo kubogi yo‘llanmasini qo‘lga kiritdi. Jamoliddin Rahmatullayev shogirdlari so‘nggi turda Suriyani 3:0 hisobida mag‘lub etdi va saralashni maksimal natija bilan yakunladi.

Guruh g‘oliblari sifatida Janubiy Koreya, O‘zbekiston, KXDR, Tojikiston, Saudiya Arabistoni, Iroq, Yaponiya va Indoneziya final bosqichiga chiqdi. Mezbon Xitoy esa musobaqada to‘g‘ridan-to‘g‘ri ishtirok etadi.

Shuningdek, eng yaxshi ikkinchi o‘rin sohiblari orasidan Livan, Hindiston, Eron, Iordaniya, Ummon, Tailand va Malayziya ham yo‘llanmani qo‘lga kiritdi.

Shu tariqa, Xitoyda Osiyo chempionligi uchun kurashadigan 16 jamoa tarkibi to‘liq shakllandi. O‘zbekiston yoshlar terma jamoasi esa U-20 Osiyo kubogining final bosqichida ketma-ket uchinchi marta ishtirok etadi. Turnir 24 martdan 1 aprelga qadar o‘tkaziladi.