Мадриднинг «Реал» клуби ҳужумчиси Винисиус Жуниор фаолиятидаги энг муҳим голлари ҳақида фикр билдирди. Қизиғи, уларнинг барчаси Чемпионлар лигасида урилган.
Бразилиялик футболчи клуб телевидениесига берган интервьюсида 2022 ва 2024 йиллардаги Чемпионлар лигаси финалларида «Ливерпуль» ҳамда Дортмунднинг «Боруссия»сига қарши урган голларини алоҳида қайд этди.
«Бу ҳаётимдаги энг муҳим икки гол. Улар тарихда абадий қолади. Кўплаб футболчилар гол уради, аммо улардан жуда камчилиги финалда ўзини кўрсата олади. Дунёнинг энг буюк клуби сафида финалда гол уриш — мен ҳам, мухлислар ҳам ҳеч қачон унутмайдиган воқеа», — деди футболчи.
