«Барселона» ярим ҳимоячиси Гави мавсумнинг «Эльче»га қарши дастлабки учрашувида олган жароҳатидан тўлиқ тикланди.

22 ёшли футболчи «Атлетик» ва «Райо Вальекано»га қарши ғалабали ўйинларни ўтказиб юборган эди. У ўтган дам олиш куни «Месталья»даги «Валенсия»га қарши баҳс учун қайдномага қайтди.

Гави йирик ҳисобдаги ғалаба билан якунланган учрашувда майдонга тушмади. Бироқ унинг захира ўриндиғида бўлиши жароҳатдан фориғ бўлгани ва мураббийлар штаби ихтиёрида эканини тасдиқлади.

Ярим ҳимоячининг қайтиши Каталония клуби учун айни муддао бўлди. «Барселона»ни Чемпионлар лигасида «Фейеноорд»га қарши дастлабки ўйин ва Ла Лигада «Леванте» билан учрашув кутиб турибди.

Гави мавсумолди тайёргарлигини яхши жисмоний ҳолатда бошлаш учун ёзги таътилини муддатидан олдин якунлаган эди. Клуб тарбияланувчиси мавсумнинг биринчи ўйинида Марк Бернал билан бирга асосий таркибда майдонга тушиб, ўзининг одатий савияси ва фидойилигини намойиш этган.

Унинг тикланиши Ханс-Дитер Фликка катта жисмоний куч талаб қиладиган ярим ҳимоя чизиғида таркибни алмаштириб туриш учун яна бир муҳим имконият берди. Гавининг тактик фойдаси ва машғулотлардаги юқори шиддати уни жамоадаги асосий вариантлардан бирига айлантирмоқда.