«Барселона»нинг собиқ футболчиси Иван Ракитич каталонияликлар жорий мавсум Чемпионлар лигасида ғолиб чиқишига ишонч билдирди.

«Менимча, бу йил Чемпионлар лигасида «Барселона»нинг йили бўлади. Жамоада ёшлик ҳам, сифат ҳам бор», — дея Ракитичнинг сўзларини The Touchline келтиради.

«Барселона» сўнгги бор Чемпионлар лигасини 2015 йилда қўлга киритган. Ўша йили Берлинда ўтган финалда каталонияликлар «Ювентус»ни 3:1 ҳисобида мағлуб этган эди. Иван Ракитич учрашувда ҳисобни очган.

«Барселона» ўз тарихида Чемпионлар лигаси кубогини жами беш марта — 1992, 2006, 2009, 2011 ва 2015 йилларда қўлга киритган.

Ўтган мавсумда каталонияликлар Чемпионлар лигасининг чорак финалигача етиб борди ва бу босқичда «Атлетико»га имкониятни бой берди.