«Галатасарой» бош мураббийи Окан Бурук УЕФА Чемпионлар лигаси 2026/2027 йилги мавсуми умумий босқичи 1-турида «Спортинг»га қарши кечган учрашувдаги ҳакамликни танқид қилди. Баҳс португалияликларнинг 3:1 ҳисобидаги ғалабаси билан якунланди.
«Бизда бу норвегиялик ҳакамдан аввал ҳам норозиликлар бўлган. Бугун кўрсатилмаган қизил карточка ва баҳсли пенальти жамоанинг руҳини тушириб юборди. Ҳамма нарса бизга қарши кечди, гарчи уч очкони бемалол қўлга киритишимиз мумкин эди. Ҳакам учрашувнинг боришига бевосита таъсир қилди. VAR ҳакамига келсак, у ҳеч нарсага аралашмагани сабабли, гўёки ўйинда умуман бўлмаган, деган таассурот пайдо бўлди», — деди Бурук.
Қайд этиш жоиз, «Галатасарой»нинг россиялик ярим ҳимоячиси Алексей Батраков асосий таркибда майдонга тушди ва 64-дақиқада алмаштирилди. 21 ёшли футболчи учун бу Чемпионлар лигасидаги дебют ўйин бўлди.
