ПСВ ўнг қанот ҳимоячиси Килиан Сидия жароҳат олди ва яқин вақт ичида операция қилинади.

24 ёшли футболчи жорий йилнинг сўнгги ойларида майдонга қайтиши мумкин.

«Албатта, бу хабар мен учун оғир зарба бўлди. Ўзимни тобора яхшироқ ҳис қилаётгандим, олдиндаги ойларни интиқлик билан кутаётган ва бу ерда ўзимни кўрсатишни хоҳлаётган эдим.

Бироқ ҳозир асосий эътиборим келажакка қаратилган. Операция — тикланиш йўлидаги биринчи қадам. Янада кучли бўлиб қайтиш учун қўлимдан келган барча ишни қиламан.

Клуб томонидан катта қўллаб-қувватловни ҳис қиляпман. Бу эса йил охирида яна майдонга қайтиш учун менга қўшимча мотивация бермоқда», — деди Сидия.

Килиан Сидия жорий мавсум ПСВ сафида 3 та ўйинда майдонга тушди. У сўнгги бор 15 август куни «Эксельсиор»га қарши баҳсда иштирок этган.

ПСВ 10 сентябрь куни Чемпионлар лигаси умумий босқичининг 1-турида «Шахтёр»га қарши майдонга тушади.