«ПСЖ» вингери Хвича Кварацхелия жамоадоши Фабиан Руиснинг футболни тушуниш қобилиятини юқори баҳолади.
«Уни жуда кам баҳолашади, чунки унинг футболни тушуниши — ақл бовар қилмайдиган даражада.
Серхио Бускетс ҳақида кимдир айтган гапни билмайман: футбол кўраётганда Бускетсни пайқамайсиз, аммо Бускетсга эътибор берсангиз — футболнинг ўзини кўрасиз.
Фаби билан ҳам худди шундай: гўё уни кўрмайсиз, аммо унинг ўйинни тушуниши ва уни бошқариши... У белгилайдиган ўйин суръати мутлақо бошқа даража», — деди Кварацхелия.
Руис ҳам Бускетс сингари Испания терма жамоаси вакили ҳисобланади. Бускетс фаолиятининг катта қисмини «Барселона»да ўтказган. Парижликлар ярим ҳимоячиси, жаҳон ва Европа чемпиони бўлган Руис жорий йилда Хвича билан бирга «Олтин тўп» учун номзодлар қаторига киритилган.
