“Башакшеҳир” клубида ўйнаётган ўзбекистонлик футболчилар Элдор Шомуродов ва Аббосбек Файзуллаев Туркия Суперлигасининг навбатдаги туридан ўрин олган “Амедспор”га қарши учрашувда асосий таркибда майдонга тушди (0:5). Файзуллаев 64-дақиқада Иван Брнич билан алмаштирилди, Шомуродов эса 83-дақиқада ўз ўрнини Беркай Ўзжанга бўшатиб берди.

Sofascore портали учрашувда Файзуллаевнинг ўйинини 6,3 баллга, Шомуродовнинг ҳаракатларини эса 6,1 баллга баҳолади.

Шомуродов ўйин давомида 29 марта тўпга тегинди. У амалга оширган 19 та узатманинг 11 таси аниқ бўлди (58 фоиз аниқлик). Ҳужумчи “Амедспор” дарвозаси томон бир марта зарба йўллади (ноаниқ) ва битта яққол голли вазиятдан фойдалана олмади. Унинг кутилган голлари кўрсаткичи (xG) 0,09 ни ташкил этди.

Аббосбек Файзуллаев учрашув давомида 29 марта тўпга тегди. У амалга оширган 18 та узатманинг 11 таси аниқ бўлди (61 фоиз). Файзуллаев дарвоза томон 2 бор зарба йўллади (бири аниқ) ва бир марта муваффақиятли дриблинг ишлатди. Шунингдек, у ердаги 7 та курашнинг 4 тасида ғолиб чиқди.

Учрашувда ҳет-трик қайд этган “Амедспор” ҳужумчиси Гифт Орбан учрашувнинг энг яхши футболчиси деб топилди — 9,4. Мезбонларнинг яна бир вакили Эрмал Красники эса 9,0 балл билан энг яхши иккинчи футболчи бўлди.