“Bashakshehir” klubida o‘ynayotgan o‘zbekistonlik futbolchilar Eldor Shomurodov va Abbosbek Fayzullayev Turkiya Superligasining navbatdagi turidan o‘rin olgan “Amedspor”ga qarshi uchrashuvda asosiy tarkibda maydonga tushdi (0:5). Fayzullayev 64-daqiqada Ivan Brnich bilan almashtirildi, Shomurodov esa 83-daqiqada o‘z o‘rnini Berkay O‘zjanga bo‘shatib berdi.

Sofascore portali uchrashuvda Fayzullayevning o‘yinini 6,3 ballga, Shomurodovning harakatlarini esa 6,1 ballga baholadi.

Shomurodov o‘yin davomida 29 marta to‘pga tegindi. U amalga oshirgan 19 ta uzatmaning 11 tasi aniq bo‘ldi (58 foiz aniqlik). Hujumchi “Amedspor” darvozasi tomon bir marta zarba yo‘lladi (noaniq) va bitta yaqqol golli vaziyatdan foydalana olmadi. Uning kutilgan gollari ko‘rsatkichi (xG) 0,09 ni tashkil etdi.

Abbosbek Fayzullayev uchrashuv davomida 29 marta to‘pga tegdi. U amalga oshirgan 18 ta uzatmaning 11 tasi aniq bo‘ldi (61 foiz). Fayzullayev darvoza tomon 2 bor zarba yo‘lladi (biri aniq) va bir marta muvaffaqiyatli dribling ishlatdi. Shuningdek, u yerdagi 7 ta kurashning 4 tasida g‘olib chiqdi.

Uchrashuvda het-trik qayd etgan “Amedspor” hujumchisi Gift Orban uchrashuvning eng yaxshi futbolchisi deb topildi — 9,4. Mezbonlarning yana bir vakili Ermal Krasniki esa 9,0 ball bilan eng yaxshi ikkinchi futbolchi bo‘ldi.