Нигерия футбол федерацияси бош котиби ўринбосари вазифасини бажарувчи Адемола Оладжире терма жамоа Россияга қарши ўйинга 23 ёшгача бўлган футболчилардан иборат таркиб билан бориши ҳақидаги хабарларни рад этди. Унинг таъкидлашича, томонлар асосий терма жамоалар ўртасида ўртоқлик учрашуви ўтказишга келишиб олган.
«Биз Россия томони билан асосий терма жамоалар ўртасида ўйин ўтказишга келишдик. Шунинг учун Россияга 23 ёшгача бўлган футболчилардан иборат жамоа бориши ҳақидаги маълумотни истисно қиламан», — деди Оладжире.
Шу билан бирга, функционер Россияга қарши баҳс ёш футболчиларни синаб кўриш учун яхши имконият бўлишини қайд этди. Бироқ у асосий таркибдаги футболчилар ҳам учрашувда иштирок этиши кераклигини таъкидлади. Россия ва Нигерия терма жамоалари ўртасидаги ўртоқлик учрашуви 6 октябрь куни Нижний Новгородда бўлиб ўтади.
