Бразилиялик ярим ҳимоячи Филиппе Коутиньо 2026 йил охиригача «Сантос» футболчисига айланди. Бу ҳақда клуб ўзининг X ижтимоий тармоғида маълум қилди.

Футболчининг сўнгги жамоаси «Васко да Гама» бўлган. Аввалроқ трансфер «Сантос» ҳужумчиси Неймарнинг кўмагида амалга оширилгани ҳақида хабарлар тарқалган эди.

34 ёшли Коутиньо фаолияти давомида «Васко да Гама», «Интер» (Милан), «Эспаньол», «Астон Вилла» (Бирмингем), «Ливерпуль», «Барселона» ва Мюнхеннинг «Бавария» клубларида тўп тепган. Шунингдек, у Бразилия терма жамоаси сафида ҳам ўйнаган.

«Футбол қироллигига хуш келибсан, Коутиньо. Олға!» — дейилади клуб хабарда.

Transfermarkt маълумотларига кўра, 34 ёшли ҳужумкор ярим ҳимоячининг трансфер қиймати 2,5 миллион еврони ташкил этади.