«Манчестер Юнайтед» 15 ёшли иқтидорли футболчи Жей Жей Габриэлни яқин орада йўқотиб қўйиш эҳтимолидан хавотирда.

Хабарларга кўра, Габриэль 6 октябрь куни 16 ёшга тўлганидан сўнг Ирландия паспортидан фойдаланиб, FIFA розилиги билан Европа клубларидан бирига ўтиш имкониятини кўриб чиқиши мумкин.

Вазият шу ҳафта футболчининг машғулотда иштирок этишдан бош тортиши ортидан янада кескинлашган. Унинг вакиллари «Манчестер Юнайтед»дан футболчининг клубдаги рўйхатдан ўтган мақомини бекор қилишни сўраган, аммо клубдагилар буни қонуний жиҳатдан амалга ошириб бўлмаслигини таъкидламоқда.

Габриэлнинг Чемпионлар лигасида «Сабаҳ»га қарши ўйин қайдномасига киритилмагани ҳам вазиятга таъсир қилгани айтилмоқда. Шу куни у «Манчестер Юнайтед»нинг 21 ёшгача бўлган жамоаси сафида хет-трик қайд этган.

15 ёшли футболчига «Барселона», «Челси» ва «Реал» қизиқиш билдирмоқда.

«Манчестер Юнайтед» Габриэлнинг ривожига катта маблағ ва ресурс сарфлагани сабаб уни текинга қўйиб юборишни истамайди. Клуб футболчини сақлаб қолиш ёки эҳтимолий кетиш ҳолатида муносиб компенсация олиш мақсадида музокараларни давом эттирмоқда.