UFC ярим ўрта вазн тоифаси чемпиони, россиялик Ислом Махачев ва собиқ икки вазн тоифаси чемпиони Жон Жонс ММА тарихидаги энг яхши жангчи (GOAT) мақоми борасида ижтимоий тармоқларда баҳсга киришди. Махачев Жонснинг фаолиятидаги допинг билан боғлиқ ҳолатларни танқид қилган бўлса, америкалик жангчи ўзини ҳимоя қилди.
Ушбу баҳс Махачев Жонснинг ғалабалар сериясини тўлиқ ҳисобга олмаслигини айтганидан сўнг бошланди. Россиялик жангчи америкалик якка кураш устасининг фаолияти давомида тақиқланган моддалар бўйича икки марта муаммога дуч келганини таъкидлаб, шу сабабли унинг ғалабалар сериясини тўлиқ тан олмаслигини билдирди.
“Мен Жон Жонсни тарихдаги энг буюк спортчилардан бири деб ҳисоблайман. Буни инкор этмайман. Аммо у икки марта допинг билан боғлиқ муаммога дуч келган. Шу сабабли унинг ғалабалар сериясини тўлиқ тан олмайман. У тақиқланган моддалар аниқланганидан кейин ҳам жангларда ғалаба қозонган. Менимча, ўша жангдан кейинги натижалардан бошлаб ҳисоб юритиш керак”, деди Махачев.
Ислом Жонснинг Даниел Корме билан жангига ишора қилган. Жонс Кормени мағлуб этганидан кейин унинг допинг тести ижобий чиққан. Натижада жанг натижаси бекор қилиниб, Жонснинг оғир вазн тоифасидаги чемпионлик камари ҳам тортиб олинганди.
Жонс эса ижтимоий тармоқ орқали Махачевнинг фикрларига жавоб қайтарди. У АҚШ антидопинг агентлиги (USADA) томонидан организмида тақиқланган анаболик стероид — туринабол жуда кам миқдорда аниқланганини айтди. Жонснинг таъкидлашича, ушбу модданинг унинг жангдаги натижасига таъсир қилгани ёки уни атайлаб қабул қилгани исботланмаган. У USADA хулосаларининг фақат бир қисмини асос қилиб, фаолиятига баҳо бериш нотўғри эканини таъкидлади.
Шу билан бирга, америкалик жангчи Махачевнинг фаолиятидаги ягона мағлубиятини эслатиб ўтди. Жонс Махачевнинг мураббийи Абдулманап Нурмагомедов илгари уни “Худонинг совғаси” деб атаганини ҳам таъкидлади. Шунингдек, Жонс Даниел Кормега қарши жангдаги ғалабасини ҳам эслатиб, Махачев ҳали барча даврларнинг энг яхши жангчиси мақоми учун курашда унинг даражасига етмаганини айтиб ўтди.
Махачев эса Жонснинг жавобидан кейин яна муносабат билдирди. У америкалик жангчининг ютуқларини камситмоқчи эмаслигини айтиб, Жонснинг фаолиятида қоидаларни бузиш билан боғлиқ ҳолатлар кўп бўлганини таъкидлади.
“Жон, мен сенинг ютуқларингни ҳеч қандай тарзда камситмоқчи эмасман. Аммо фаолиятинг давомида қоидаларни бузиш билан боғлиқ ҳолатлар кўп бўлган. Шунга қарамай, сен ҳар сафар ўзингни айбдор эмасдек кўрсатасан”, деб ёзди Махачев.
Ислом Махачев ҳам, Жон Жонс ҳам UFCда икки вазн тоифасида чемпионлик камарини қўлга киритган. Махачев айни пайтда ярим ўрта вазн тоифасида чемпион ҳисобланади. У сўнгги жангида Ян Мачадо Гаррини мағлуб этиб, UFCдаги кетма-кет ғалабалари сонини 17 тага етказди ва Андерсон Силванинг рекордини янгилади.
Жонс эса 2024-йилда Стипе Миочични мағлуб этганидан сўнг ММАдаги фаолиятини якунлаган. Кейинчалик у оғир вазн тоифасидаги чемпионлик камаридан воз кечган эди.
