Ўзбекистон Кубоги 1/8 финал босқичида ОКМК ўз майдонида "Хоразм"ни 2:1 ҳисобида мағлуб этиб, чорак финал йўлланмасини қўлга киритди.

Учрашувда ҳисоб 60-дақиқада очилди. Ҳакам белгилаган пенальтини Сиаваш Ҳақназарий аниқ амалга ошириб, ОКМКни олдинга олиб чиқди.

"Хоразм" баҳснинг 86-дақиқасида жавоб қайтарди. Захирадан майдонга тушган Умидбек Султонов ҳисобни тенглаштирди — 1:1.

Баҳс тақдири қўшиб берилган дақиқаларда ҳал бўлди. 90+10-дақиқада ОКМК яна пенальти тепиш ҳуқуқига эга бўлди ва Ҳақназарий иккинчи бор нуқтадан хатога йўл қўймади — 2:1.

Шу тариқа, Сиаваш Ҳақназарийнинг дубльи ОКМКга қийин ғалаба ва Ўзбекистон Кубоги чорак финали йўлланмасини тақдим этди.