Мадриднинг «Реал» клуби ҳужумчиси Килиан Мбаппе «Эльче»га қарши Испания чемпионатининг 6-тур учрашуви (2:3) олдидан ўтказилган акция вақтида Сеута аҳолисини қўллаб-қувватловчи ёзувни нега футболкасида қисман яширганини тушунтирди.
Эслатиб ўтамиз, Мбаппе, Винисиус Жуниор ва Ибраима Конате Сеута аҳолисини қўллаб-қувватловчи ёзув туширилган футболкаларни кийишган. Бироқ улар футболкани ярмигача беркитишгани сабабли ёзув тўлиқ кўринмаган. Шунингдек, Мбаппе ва Винисиус «Реал» футболчилари орасида биринчи бўлиб футболкаларини ечишган.
«Бу клубнинг қарори эди. Футболчилар футболкаларни кийишлари керак эди.
Айтишим керак бўлган биринчи нарса — мен Сеута ва жабрланганларнинг барчасини тўлиқ қўллаб-қувватлайман. Чунки мен нафақат футболчи, балки инсон ҳамман. Шу билан бирга, ҳалок бўлган ёки оғир шароитларда яшаётган барча муҳожирларни қўллаб-қувватлашга ҳам эътибор қаратмоқчи эдим.
Мен қийин вазиятга тушиб қолдим, чунки одамлар мени Сеута аҳолисига нисбатан душманлик кайфиятида деб ўйлашлари мумкин эди. Аммо аслида ундай эмас. Мен уларга қарши эмасман ва уларнинг позициясини 100 фоиз қўллаб-қувватлайман. Лекин мен азият чекаётган барча инсонлар ҳақида ҳам ўйлашни хоҳладим. Чунки мен инсонман ва бир кишининг азобини бошқа бировникидан устун қўйишни истамайман.
Дунёда азият чекаётган инсонлар бор ва буни кўриш менга жуда оғир. Мен биз яшаётган дунё учун яхшироқ келажакни истайдиган инсонман. Ижобий сигнал юбормоқчиман ва ушбу вазият тез орада ҳал бўлишидан умид қиламан», — дея Мбаппенинг сўзларини келтиради AS.
