«Бавария» бош мураббийи Венсан Компани Германия чемпионатининг 4-турида «Унион» устидан қозонилган 7:0 ҳисобидаги ғалабага изоҳ берди. Франциялик ҳужумчи Микаэль Олисе хет-трик қайд этди ва яна бир голли узатмани амалга оширди.

«Албатта, бундай ажойиб ғалабадан жуда хурсандмиз. Энди мухлислар Октоберфестга йўл олишлари мумкин. Бу улар учун яхши совға бўлди.

Бугун футболчиларнинг ҳар бир тўп учун қандай иштиёқ билан курашганини кўрдингиз. Албатта, Олисе бу голларни жуда маҳорат билан урди, аммо у машғулотларда бундай зарбалар устида кўп ишлаган.

Топ-футболчиларга ҳам фақат иқтидорнинг ўзи етарли эмас. Бунинг ортида улкан меҳнат ётади», — дея Компанининг сўзларини клуб расмий сайти келтирди.