Аргентиналик машҳур собиқ футболчи Серхио Агуэро Криштиану Роналдунинг фаолиятида 1000 та гол уриш мақсади ҳақида фикр билдирди.

Айни пайтда «Ан-Наср» сафида тўп сураётган 41 ёшли португалиялик футболчи ҳисобида 979 та гол бор.

«Роналду яна қанча вақт футбол ўйнашини билмайман, аммо унга атиги 21 та гол қолди. Менимча, у бу натижага албатта эриша олади. Мавсум тугагач, фаолиятини давом эттирадими-йўқми, режалари қандай — буни билмайман.

Гол уриш унчалик осон эмас, аммо у доимий равишда буни уддалаб келяпти. Бу жиҳатдан Роналду Лео Мессига ўхшайди — у майдонда бўлса, гол уриш эҳтимоли доимо юқори бўлади. Агар яна бир мавсум қолса, менимча, 1000-голга етади», — дея Агуэронинг сўзларини Al Nassr Zone келтирди.

Криштиану Роналду жорий мавсумда 7 та ўйин ўтказиб, 3 та гол урган.