Нигерия футбол федерацияси «Галатасарай»нинг ҳужумчи Виктор Осимхенни яқинлашиб келаётган халқаро танаффусда терма жамоа чақирувидан озод қилиш ҳақидаги расмий сўровини рад этди. Бу ҳақда Goal хабар берди.

Осимхен жароҳати сабаб икки ҳафтадан буён майдонга тушмаяпти. «Галатасарой» терма жамоалар ўйинлари учун танаффус пайтида тўлиқ дам олиш ҳужумчига жароҳатидан батамом тикланиб, сафга қайтиш имконини беради, деб умид қилган эди.

Нигериялик футболчи Туркия чемпионати 4-туридан ўрин олган «Башакшехир»га қарши ва 3:2 ҳисобида якунланган учрашувнинг 33-дақиқасида жароҳат олган. Тиббий текширувлар унда мушак шикастланиши ва ўнг сон қисмида оғриқ борлигини кўрсатган.

Нигерия терма жамоаси Африка кубоги саралаш босқичи доирасида Мадагаскар ва Гвинея-Бисауга қарши иккита учрашув ўтказади.