«Бавария» бош мураббийи Венсан Компани ҳужум чизиғида кўпроқ вариантларга эга бўлишни истамоқда. Бунга Харри Кейн ва Серж Гнабрининг ёши, Жамал Мусиаланинг соғлиги билан боғлиқ муаммолар ҳамда Луис Диаснинг беқарор ўйини сабаб сифатида кўрсатилмоқда.
Шу боис Мюнхен клуби ўз трансфер мақсадлари рўйхатига «Барселона»нинг ҳужумкор ярим ҳимоячиси Дани Ольмони ҳам киритган.
«Бавария» аввал ҳам Ольмони сотиб олишга уринган, аммо бу ҳаракат муваффақиятсиз якунланган эди. Шунга қарамай, футболчи ҳали ҳам мюнхенликлар эътиборида қолмоқда. Дани Компанига жуда ёқади. Бундан ташқари, унинг «РБ Лейпциг»даги фаолияти туфайли Бундеслига билан яхши таниш экани ҳам муҳим омил ҳисобланади. Шу сабаб Ольмога Германиядаги ҳаёт ва футболга мослашиш учун кўп вақт талаб этилмайди.
El Nacional нашри Bild'га таяниб хабар беришича, «Бавария» музокараларни бошлашни режалаштирмоқда ва футболчи учун 70 миллион евро таклиф қилиши мумкин.
Мюнхенликлар Ольмонинг «Барселона»да камроқ ўйин амалиётига эга бўлаётганидан фойдаланмоқчи. Айни пайтда у асосий таркиб учун курашда Фермин Лопесга ютқазмоқда. Бу ҳолат Дани Ольмони клубини алмаштириш ҳақида ўйлашга ундаши мумкин.
Энди асосий масала — «Барселона» президенти Жоан Лапорта Дани Ольмони қўйиб юборишга рози бўладими ёки йўқ.
