Мюнхеннинг «Бавария» клуби бош мураббийи Венсан Компани клуб инглиз ҳужумчиси Харри Кейн билан шартномани узайтириш бўйича музокаралар олиб бораётганини айтиб берди. Амалдаги келишув келаётган ёзда ўз ниҳоясига етади. Кейн «Бавария»га Англиянинг «Тоттенхэм» клубидан ўтган эди.
«Клуб музокаралар олиб бормоқда. Клубимизда Макс Эберль, Кристоф Фройнд ва Ян Дрезен тимсолида ажойиб раҳбарият бор, улар ушбу масала билан шуғулланишмоқда. Бунинг учун вақт талаб этилишини тушунаман. Мен учун энг муҳими — у ўзини яхши ҳис қилиши ва ўзининг энг яхши ўйинини кўрсатишидир», — деди Компани Bayern & Germany нашрига.
Ушбу мавсумда Харри Кейн мюнхенликлар сафида барча турнирларда еттита ўйинда майдонга тушди. Ҳужумчи олтита гол урди ва иккита голли узатмага муаллифлик қилди.
