«Барселона» ҳужумчиси Рафинья Диас жамоадоши Ламин Ямални афсонавий Роналдиньо билан солиштирди.
«Ёшлигимда Роналдиньо ўйинини томоша қилганимда кўзларим ёниб кетарди. Ҳозир Ламиннинг ўйинини кузатганимда ҳам менда худди шундай ҳис-туйғулар пайдо бўлади. У майдонда ҳақиқий сеҳр кўрсатмоқда: голлар урмоқда, голли узатмалар бермоқда, совринларни қўлга киритмоқда», — деди Рафинья RAC1 нашрига берган интервьюсида.
Жорий мавсумда 19 ёшли Ямаль барча мусобақаларни инобатга олганда еттита ўйинда майдонга тушиб, рақиблар дарвозасини саккиз бор ишғол этди ва ўз ҳисобига тўртта голли узатмани ёзиб қўйди.
Ҳозирги вақтда Ямаль — сайёранинг энг қиммат футболчиси ҳисобланади. Transfermarkt испаниялик футболчини 220 миллион еврога баҳоламоқда.
