«Барселона» президенти Жоан Лапорта клуб Лионель Месси шарафига янгиланган «Камп Ноу» стадионида махсус маросим ўтказишни режалаштираётганини маълум қилди. Тадбир стадиондаги реконструкция ишлари тўлиқ якунланганидан кейин ва аргентиналик футболчининг розилиги билан ташкил этилиши мумкин.

«Биз Мессига стадион тўлиқ тайёр бўлганидан кейин унинг шарафига маросим ўтказмоқчи эканимизни айтдик. Агар у истаса, стадион қурилиши якунлангач, бу тадбирни ташкил қиламиз», деди Лапорта.

«Барселона» раҳбарининг сўзларига кўра, бундай маросим янгиланган стадион тўлиқ сиғим билан ишлай бошлаганида, қарийб 105 минг томошабин иштирокида ўтказилиши мумкин. Ҳозирча тадбирнинг аниқ санаси белгиланмаган.

Лапорта шунингдек, 8 август куни 68 ёшида вафот этган Лионель Мессининг отаси Хорхе Месси хотирасини ёдга олиб, футболчининг оиласига ҳамдардлик билдирди. Хорхе Месси ўғлининг фаолияти давомида унинг вакили сифатида ҳам муҳим роль ўйнаган.

Лионель Месси «Барселона» асосий жамоаси сафида 2004 йилдан 2021 йилгача ўйнади. У клуб учун 778 та расмий учрашувда 672 та гол урди ва 35 та соврин қўлга киритди. Улар орасида 10 та Испания чемпионлиги ва 4 та Чемпионлар лигаси кубоги бор.