«Барселона» марказий ярим ҳимоячиси Марк Берналь клуб билан 2031 йил июнь ойига қадар мўлжалланган янги шартнома имзолашга розилик берди. Бу ҳақда инсайдер Фабрицио Романо хабар қилди.

Футболчининг амалдаги шартномаси 2029 йил 30 июнга қадар кучда.

Янги келишув Бернальнинг агентлари ва «Барселона» спорт директори Деку ўртасида келишиб олинган. Ҳужжатлар келаси ҳафта имзоланиши кутилмоқда. Шунингдек, 19 ёшли испаниялик футболчининг маоши оширилади.

Берналь «Барселона» тарбияланувчиси ҳисобланади. У 2014 йилдан буён клуб тизимида фаолият юритиб келмоқда.

Жорий мавсумда ярим ҳимоячи 8 та учрашувда майдонга тушиб, 2 та голли узатмани амалга оширган.