«Барселона» «Атлетико Паранаэнсе» ҳимоячиси Артур Диасга бўлган қизиқишини кучайтирди. UmDois Esportes хабарига кўра, клубнинг бош скаути Жоау Амарал 19 ёшли футболчининг ўйинини кузатиш учун Бразилияга борган.

Амарал «Атлетико Паранаэнсе»нинг «Баия» устидан 2:1 ҳисобида ғалаба қозонган учрашувини «Арена да Байшада» стадионидан кузатган. Унинг мазкур ўйинда ҳозир бўлиши Каталония клубининг марказий ҳимоячига жиддий қизиқиш билдирayotganини кўрсатади. Амарал «Барселона» спорт директори Деку билан яқин ҳамкорликда ишлайди.

Диас Карло Анчелотти томонидан илк бор Бразилия терма жамоасига чақирилганидан сўнг Европанинг бир қатор клублари эътиборини тортди.

Аввалроқ «Тоттенхэм» футболчининг ҳуқуқларининг 80 фоизи учун 21 миллион евро таклиф қилган, аммо бу таклиф рад этилган. Маълумотларга кўра, «Атлетико Паранаэнсе» Диас учун камида 30 миллион евро талаб қилмоқда.

Артур Диас жорий мавсум Бразилия чемпионатида 26 та учрашувда майдонга тушди. Унинг клуб билан шартномаси 2028 йил декабрига қадар амал қилади.