«Barselona» «Atletiko Paranaense» himoyachisi Artur Diasga bo‘lgan qiziqishini kuchaytirdi. UmDois Esportes xabariga ko‘ra, klubning bosh skauti Joau Amaral 19 yoshli futbolchining o‘yinini kuzatish uchun Braziliyaga borgan.

Amaral «Atletiko Paranaense»ning «Baiya» ustidan 2:1 hisobida g‘alaba qozongan uchrashuvini «Arena da Bayshada» stadionidan kuzatgan. Uning mazkur o‘yinda hozir bo‘lishi Kataloniya klubining markaziy himoyachiga jiddiy qiziqish bildirayotganini ko‘rsatadi. Amaral «Barselona» sport direktori Deku bilan yaqin hamkorlikda ishlaydi.

Dias Karlo Anchelotti tomonidan ilk bor Braziliya terma jamoasiga chaqirilganidan so‘ng Yevropaning bir qator klublari e’tiborini tortdi.

Avvalroq «Tottenxem» futbolchining huquqlarining 80 foizi uchun 21 million yevro taklif qilgan, ammo bu taklif rad etilgan. Ma’lumotlarga ko‘ra, «Atletiko Paranaense» Dias uchun kamida 30 million yevro talab qilmoqda.

Artur Dias joriy mavsum Braziliya chempionatida 26 ta uchrashuvda maydonga tushdi. Uning klub bilan shartnomasi 2028 yil dekabriga qadar amal qiladi.