Собиқ ҳакам Пабло Гонсалес Фуэртес «Реал»нинг «Атлетико»га қарши учрашувидан (1:2) кейин Жозе Моуриньонинг ҳакамлар бригадаси ҳақида билдирган фикрларига муносабат билдирди.

«Реал» бош мураббийи Моуриньо Мигель Анхель Ортис Ариас бошчилигидаги ҳакамлар бригадаси ишини танқид қилганди: «Ҳакам 41 ёшда, дербида ишлаш учун унга тажриба етишмади. У кучсиз ҳакам, фақат кичик ўйинларда ишлаган. Ҳакамлар қўмитасини табриклайман».

«Ҳар қандай мураббий ёки футбол учрашуви иштирокчисининг ўз фикри бўлади ва бошқа ҳар қандай фикр каби уни ҳам ҳурмат қилиш керак. Аммо, менимча, бундай камситувчи оҳангдаги сўзларни ишлатиш шарт эмас.

Бу масалага Ҳакамлар техник қўмитаси жавоб бериши керак, чунки танқид бевосита қўмитага қаратилган. Менимча, улар муносабат билдириши лозим, аммо бундай қилмайди», — деди Фуэртес.