«Реал» Мадрид дербисида «Атлетико»га 1:2 ҳисобида мағлуб бўлганидан сўнг ҳакамликдан норози бўлди. Жамоа ҳужумчиси Килиан Мбаппе эса учрашувдаги ҳакамлик борасида ўз фикрини билдирди, аммо мағлубият сабабини ҳакамларга боғламади.
«Мен ҳакамлар ҳақида кўп гапирадиган футболчи бўлмаганман. Ҳозир буни бошламоқчи ҳам эмасман. Ўз фикрим бор, лекин уни ўзимда қолдираман. Ҳакам ҳам инсон, у ҳам хатога йўл қўяди. Бу ерда хатолар бўлди, аммо мен бу мавзуни чуқур муҳокама қилишни истамайман.
Биз ишлашимиз ва янада кўпроқ ҳаракат қилишимиз керак. Бошқалар гапиравериши мумкин, аммо биз «Реал»га иштиёқ ва совринларни қайтариш учун меҳнат қилишимиз лозим», — деди Мбаппе.
