«Ювентус» ҳужумчиси Рандаль Коло Муани ўнг қўли бармоғи синиши сабабли жарроҳлик амалиётини ўтказди. Бу ҳақда клуб матбуот хизмати хабар берди.

27 ёшли франциялик футболчи А Сериянинг 5-туридан ўрин олган «Аталанта»га қарши учрашувнинг (2:0) биринчи бўлимида жароҳат олган.

Футболчининг ўнг қўлидаги жимжилоғи жароҳатланган. Ўйиндан кейин ўтказилган текширув бармоқнинг проксимал фалангаси синганини тасдиқлади. Шу сабабли жарроҳлик аралашуви талаб этилди ва остеосинтез амалиёти ўтказилди.

Клуб хабарида айтилишича, шу куни кундузи ўтказилган операция муваффақиятли якунланган. Шунга қарамай, Коло-Муани жамоа қайдномасига киритилиши мумкин.

2026/27 йилги мавсумда Коло Муани 6 та ўйинда майдонга тушиб, 1 та гол урди ва 2 та голли узатмани амалга оширди. Унинг «Ювентус» билан шартномаси 2031 йилнинг 30 июнига қадар амал қилади.