"Ливерпуль"нинг собиқ футболчиси Владимир Шмицер Флориан Вирцнинг мерсисайдликлар сафини тарк этиши мумкинлиги ҳақида фикр билдирди.
"Аввало Вирцнинг ўзи қандай фикрда эканини билиш муҳим. У бу ерда бахтлими ёки йўқми, билмайман, аммо ҳали ҳам ўз салоҳиятини тўлиқ намоён қилиб, "Ливерпуль"да муваффақият қозонишига ишонаман.
У ҳали жуда ёш ва мен унинг клубда яна бир неча йил қолишини истардим. Ҳозирги пайтда уни на "Бавария"га, на бошқа бирор клубга сотган бўлардим", — деди Шмицер Grosvenor Sport'га.
Унинг фикрича, Вирцдан жуда катта нарсалар кутилаётгани муаммо туғдирмоқда. Бунга футболчи учун тўланган катта трансфер суммаси сабаб бўлган.
Шмицер бу ҳолатни Пол Погбанинг "Манчестер Юнайтед"даги вазияти билан таққослади.
Эслатиб ўтамиз, "Ливерпуль" 2025 йилда Вирцни 125 миллион еврога сотиб олган эди.
Жорий мавсумда 23 ёшли ярим ҳимоячи барча мусобақаларда 6 та учрашувда майдонга тушиб, 1 та голли узатма амалга оширди.
