Хитойлик 13 ёшли сузувчи Ю Зиди 2026-йилги Осиё ўйинларида кетма-кет иккинчи кун олтин медални қўлга киритиб, яна бир рекорд ўрнатди. У аёллар ўртасидаги 200 метрга комплекс сузиш баҳсида 2 дақиқа 6,10 сония натижа қайд этди. Бу вақт Осиё ўйинлари рекордига айланди.

Ю Зиди 16-октябрь 2012-йилда Хитойнинг Баодинг шаҳрида туғилган. У олти ёшида отаси билан сув паркига борганида мураббий эътиборига тушган ва шундан сўнг сузиш билан шуғуллана бошлаган.

Спортчи Осиё ўйинларидаги дебютини муваффақиятли ўтказмоқда. У бир кун аввал 200 метрга баттерфлай усулида сузишда 2:05,08 натижа билан олтин медални қўлга киритиб, мусобақа рекордини янгилаганди.

200 метрга комплекс сузиш финалида Ю Зиди жамоадоши Ю Йитингни ортда қолдирди. Йитинг 2:07,99 натижа билан иккинчи, япониялик Мио Нарита эса 2:10,40 натижа билан учинчи бўлди.

Янги рекорд Ю Зидини ушбу йўналишда Осиёнинг энг тезкор сузувчисига айлантирди. Унинг натижаси канадалик Саммер МакИнтош томонидан ўрнатилган жаҳон рекордидан атиги 0,40 сонияга ортда қолди.

Ю Зиди 2025-йилда Сингапурда ўтказилган Жаҳон чемпионатида 12 ёшида Хитойнинг 4х200 метрга эркин усулдаги эстафета жамоаси таркибида бронза медалини қўлга киритганди. Шу тариқа, у Жаҳон чемпионатлари тарихидаги энг ёш медал соҳибига айланган.

Гарчи сув спорти мусобақаларида қатнашиш учун одатда камида 14 ёш талаб қилинса-да, Ю Зиди саралаш мезонларидаги юқори натижаларни қайд этгани сабабли жаҳон чемпионатида иштирок этиш ҳуқуқини олган.

Ю Зиди Осиё ўйинларида яна бир шахсий олтин медални 400 метрга комплекс сузиш баҳсида қўлга киритиши мумкин. Ушбу баҳс 23-сентябрь куни ўтказилади.

Маълумот учун, ҳозирда Хитой делегацияси медаллар бўйича биринчи ўринни эгаллаб турибди. Улар ҳисобида жами 49 та медал бор — 30 та олтин, 12 та кумуш ва 7 та бронза.