Микел Артета «Арсенал» билан янги шартнома имзолаб, йилига 15 миллион фунтдан ортиқ маош олади.

Инсайдер Бен Жейкобс маълумотига кўра, янги келишув камида уч йилга мўлжалланган. Бироқ шартноманинг аниқ муддати ва молиявий тафсилотлари ҳозирча расман тасдиқланмаган.

Артета 2019 йил декабридан буён «Арсенал»ни бошқариб келмоқда. Испаниялик мутахассис шу вақт давомида жамоани босқичма-босқич қайта қуриб, уни яна юқори совринлар учун курашадиган клубга айлантирди.

Ўтган мавсумда Артета «Арсенал»нинг Англия Премьер-лигасидаги 22 йиллик чемпионлик интизорига барҳам берди. Шунингдек, у Лондон клубини Чемпионлар лигаси финалига олиб чиқди.

Янги шартнома мураббийнинг аввалги маошига нисбатан сезиларли ўсишни англатади. Аввалги хабарларда Артета йилига қарийб 10 миллион фунт маош олгани, «Арсенал» Чемпионлар лигасига йўлланма олган тақдирда эса унга яна 5 миллион фунтгача бонус тўланиши мумкинлиги айтилган эди.

Янги келишув орқали «Арсенал» раҳбарияти Артетанинг сўнгги йиллардаги натижаларини муносиб баҳолаш ва у билан узоқ муддатли ҳамкорликни давом эттиришни мақсад қилган.