«Ливерпуль»нинг собиқ ҳимоячиси, 2026 йилнинг ёзида «Тоттенхэм» билан шартнома имзолаган Энди Робертсон ўтган ёзги мавсумлараро танаффусда, жамоа ҳужумчиси Диогу Жотанинг ҳалокатидан сўнг мерсисайдликлар лагерида нималар юз берганини айтиб берди.
Эслатиб ўтамиз, Жота ўтган йилнинг июль ойида укаси билан бирга автоҳалокатда ҳалок бўлган эди.
«Бу ҳақда гапириш ёки ҳатто сўз билан таърифлаш жуда қийин. Биз бошдан кечирган нарсалар даҳшатли эди.
Янги келган футболчилар қайғудан вайрон бўлган клубга келишди. Мен бу йигитларга жуда ачиндим: улар шартнома имзолашди, устига-эса катта пул эвазига, аммо мослашиб кетишлари учун ойлаб вақт керак бўлди. Футбол хаёлимизга ҳам келмасди, чунки биз кийиниш хонасидаги энг яқин дўстларимиздан бирини йўқотган эдик.
Барча футболчиларда ички шижоат, руҳият бўлади ва уни йўқотганингизда, ўзингизнинг энг яхши ўйинингизни кўрсата олмайсиз. Менимча, ўтган мавсумда биз ана шу руҳиятни йўқотдик.
Ортга назар ташлаб, тушуняпманки, биз ўша қатьиятни бироз йўқотиб қўйгандик, чунки баъзида ўзимизни «Бунинг нима кераги бор? Жотанинг оиласи нималарни бошдан кечираётганига қаранг... Унинг фарзандларига қаранг...» деган хаёлда тутардик.
Ўлимидан бир ҳафта олдин мен унинг тўйида эдим. Бу энг оғир синовлардан бири: инсонни ҳаётидаги энг бахтли кунида кўриб, атиги бир ҳафтадан сўнг унинг оиласи қайғудан вайрон бўлганига гувоҳ бўлиш.
Фожиадан сўнг биз кўп гаплашдик. Murabbiyга қойил қолиш керак — у ўзини ажойиб тутди. Мавсумга тайёргарликнинг ўзи деярли бўлмади, чунки Арне: «Агар машғулот ўтказишни хоҳламасангиз — ўтказманг», деди. Унинг мавсумга тайёргарликка ёндашуви шундай бўлди. Клубда психолог ишлади, у кичик гуруҳлар ташкил этди, у ерда қаҳва ичиб, гаплашиш мумкин эди. Биз тез-тез йиғилиб турардик ва менимча, бу ёрдам берди.
Аммо, охир-оқибат, биз футбол ўйнашимиз керак эди. Бизда бошқа танлов йўқ эди. Биз буни қўлимиздан келганича энг яхши тарзда қилишга ҳаракат қилдик ва эҳтимол, айнан шунинг учун ўтган мавсум шунчалик оғир кечгандир», — деди Робертсон The Overlap нашрига.
2025/26 йилги мавсум якунларига кўра, «Ливерпуль» АПЛда 5-ўринни эгаллади.
