Мюнхеннинг «Бавария» клуби «Барселона»нинг испаниялик ярим ҳимоячиси Дани Ольмони сотиб олишга ҳаракат қилади. Бу ҳақда Sky Sports манбаси X ижтимоий тармоғида хабар бермоқда.
Қайд этилишича, бошқа жамоаларнинг Жамал Мусиала ва Майкл Олисега бўлган қизиқиши ортиб бораётгани мюнхенликларнинг ушбу хавбекка эътибор қаратишига сабаб бўлган. Клуб раҳбарияти янги ҳужумкор футболчи билан шартнома имзолаш зарурати туғилиши мумкин бўлган вазият учун вариантларни ўрганмоқда.
Дани Ольмо 2024 йилнинг августида «Барселона»га келиб қўшилган эди. Жорий мавсумда 28 ёшли испаниялик ярим ҳимоячи барча мусобақаларда саккизта ўйинда майдонга тушиб, ўз ҳисобига учта гол ёзиб қўйди, аммо ассист қайд этмади.
