Нидерландия терма жамоаси ҳужумчиси Коди Гакпо Германия футболчиларининг Брайан Бробби жароҳат олиб майдонда ётган пайтда ўйинни давом эттирганидан норози бўлди.

Миллатлар лигасидаги учрашув 1:1 ҳисобида якунланди. Биринчи бўлимда Бробби жароҳат олиб, майдон марказида ётиб қолди. Нидерландия футболчилари ўйин тўхтатилишини кутган, аммо испаниялик ҳакам Алехандро Эрнандес Эрнандес баҳсни давом эттирди.

Германия футболчилари ҳам ҳужумни тўхтатмади ва вазият охир-оқибат Феликс Нмечанинг голи билан якунланди. Шундан сўнг икки жамоа футболчилари ўртасида тортишув юзага келди.

«Ҳа, албатта, ҳаммаси уларнинг голидан бошланди. Бизнингча, бу спортга хос бўлмаган ҳаракат эди. Бу борада аниқ қоида йўқ, аммо футболчи жароҳат сабаб майдонда ётган бўлса, ўйинни тўхтатиш керак, деб ўйлайман.

Аммо улар ҳужумни давом эттиришни танлади. Айтганимдек, бу спортга хос эмас эди. Шу сабаб майдондаги вазият янада кескинлашди», — деди Гакпо.