Хорватия U-21 терма жамоаси бош мураббийи Ивица Олич Европа чемпионати саралаш босқичида Венгрияга қарши бўлажак учрашув олдидан жамоанинг тайёргарлиги ҳақида фикр билдирди.

«Барча футболчилар машғулотларда тўлиқ иштирок этди. Учта яхши машғулот ўтказдик. Янги чақирилган футболчилар ҳам жамоага тез мослашди. Энг муҳими, футболчилар соғлом ва эртанги ўйинга тайёр», — деди Олич.

Мураббий Венгрия терма жамоаси таркиби сезиларли ўзгарганини таъкидлади. Рақиб янги бош мураббий билан иккита учрашув ўтказган ва таркибида аввал U-21 терма жамоаси сафида майдонга тушмаган тўққиз нафар футболчи бор. Оличнинг сўзларига кўра, рақибнинг асосий таркибини олдиндан аниқлаш қийин.

«Биз бу учрашувни ягона ва сўнгги ўйиндай қабул қиляпмиз. Биринчи кунданоқ унга тайёргарлик кўрдик. Барча эътиборимиз Венгрияга қаратилган. Бу баҳс Европа чемпионатига қўйилган мақсад сари яна бир қадам. Ижобий натижалар сериясини давом эттиришга умид қиламиз», — деди хорватиялик мураббий.

Хорватия U-21 терма жамоаси ҳозир 13 очко билан гуруҳда пешқадам. Венгрия ҳисобида эса 3 очко бор. Жамоалар 26 сентябрь куни Вараждинда ўзаро баҳс олиб боради.