Goal портали Англия ОАВ "Манчестер Сити" атрофидаги вазиятни қандай ёритаётганига эътибор қаратди. Мустақил комиссия клубни молиявий қоидаларни бузиш бўйича қўйилган 115 та айбловнинг 114 таси бўйича айбдор деб топгани айтилмоқда.
The Telegraph газетаси материалларидан бири "Манчестер Ситининг қуйи лигага туширилиши" сарлавҳаси билан чоп этилди.
Мақолада иш кўламини ҳисобга олган ҳолда, клуб жиддий жазога дуч келиши кераклиги таъкидланган. Шунингдек, текширув қамраб олган 2008–2018 йиллар давомида қўлга киритилган Премьер-лига чемпионликларидан маҳрум қилиш сценарийси ҳам тилга олинган.
"Биз ҳақиқатан ҳам мисли кўрилмаган вазиятга дуч келдик ва бу мисли кўрилмаган жазони талаб қилади", — дейилади мақолада.
The Times эса Премьер-лиганинг бир нечта клуби, масалан, қўлдан бой берилган ҳомийлик бонуслари учун компенсация талаб қилиш ҳуқуқига эга ёки йўқлигини аниқлаш мақсадида ҳуқуқшуносларга мурожаат қилганини ёзди.
Англия матбуотида "Манчестер Сити"ни Премьер-лигадан четлатиш ёки клубдан очколарни олиб ташлаш эҳтимоли ҳам муҳокама қилинмоқда.
