Goal portali Angliya OAV "Manchester Siti" atrofidagi vaziyatni qanday yoritayotganiga e’tibor qaratdi. Mustaqil komissiya klubni moliyaviy qoidalarni buzish bo‘yicha qo‘yilgan 115 ta ayblovning 114 tasi bo‘yicha aybdor deb topgani aytilmoqda.

The Telegraph gazetasi materiallaridan biri "Manchester Sitining quyi ligaga tushirilishi" sarlavhasi bilan chop etildi.

Maqolada ish ko‘lamini hisobga olgan holda, klub jiddiy jazoga duch kelishi kerakligi ta’kidlangan. Shuningdek, tekshiruv qamrab olgan 2008–2018 yillar davomida qo‘lga kiritilgan Premyer-liga chempionliklaridan mahrum qilish ssenariysi ham tilga olingan.

"Biz haqiqatan ham misli ko‘rilmagan vaziyatga duch keldik va bu misli ko‘rilmagan jazoni talab qiladi", — deyiladi maqolada.

The Times esa Premyer-liganing bir nechta klubi, masalan, qo‘ldan boy berilgan homiylik bonuslari uchun kompensasiya talab qilish huquqiga ega yoki yo‘qligini aniqlash maqsadida huquqshunoslarga murojaat qilganini yozdi.

Angliya matbuotida "Manchester Siti"ni Premyer-ligadan chetlatish yoki klubdan ochkolarni olib tashlash ehtimoli ham muhokama qilinmoqda.