Ирландия терма жамоаси футболчилари Исроилга қарши ўйин олдидан рақиблар билан қўл бериб кўришмасликка қарор қилди.

27 сентябрь куни Ирландия ва Исроил Миллатлар лигаси доирасида ўзаро майдонга тушади.

Аввалроқ Ирландия терма жамоаси дарвозабони ушбу учрашувда иштирок этишни истамаётгани, унинг позициясини яна бир нечта футболчи қўллаб-қувватлаши мумкинлиги ҳақида хабар берилган эди.

Якунда жамоада овоз бериш ўтказилди ва футболчиларнинг аксарияти ўйинни бойкот қилмаслик тарафдори бўлди.

Ирландия футбол ассоциацияси бош директори Дэвид Куреллнинг маълум қилишича, учрашув олдидан қўл бериб кўришиш ва байроқчалар алмашиш маросими бўлмайди.

Шунингдек, Ирландия футболчилари Ғазо секторидаги можаро давомида ҳалок бўлган барча инсонлар хотираси учун қора боғичда майдонга тушади.

Курелл терма жамоа футболчилари ушбу йиғин давомида матбуот анжуманларида қатнашмаслигини ҳам маълум қилди.

"Кечаги суҳбатдан кейин футболчилар футболга алоқаси бўлмаган саволларга жавоб беришга мажбур бўлаётган бу муҳитда ўзларини ноқулай ҳис қилаётгани маълум бўлди", — деди у.