«Ноттингем Форест» «Шемрок Роверс» ҳужумчиси Майкл Нунан билан келишувга эришганини расман тасдиқлади.

Юқори баҳоланаётган 18 ёшли футболчи амалдаги клуби билан шартномаси якунлангач, 2027 йил январь ойида Англия Премьер-лигаси вакили сафига қўшилади.

Нунан 2025 йил февраль ойида Конференциялар лигасида гол урган энг ёш футболчига айланиб, тарихга кирган эди. Шунингдек, у Европа мусобақалари тарихида гол урган иккинчи энг ёш футболчи ҳисобланади.

Бундан ташқари, Нунан Ирландия U-21 терма жамоаси тарихида гол урган энг ёш футболчи ҳамдир.

Сўнгги икки йил давомида Нунанга «Челси», «Манчестер Сити», «Бенфика», «Аякс», «Хоффенхайм» ва «Селтик» каби клублар қизиқиш билдирган эди. Шу боис «Ноттингем Форест»нинг уни ўз сафига қўшиб олиши клуб учун муҳим трансфер ютуғи сифатида баҳоланмоқда.