«Манчестер Сити»нинг Англия Премьер-лигасидаги рақиблари клубга қарши иш жорий мавсумнинг ўзидаёқ якунланишини истамоқда.

The Times хабарига кўра, АПЛ клублари якуний қарор жорий мавсум тугагунига қадар чиқарилишини, эҳтимолий жазо чоралари эса кейинги мавсумдан кучга киришини хоҳламоқда.

Клублардан бири раҳбари ишни кўриб чиқиш жараёни 2027/28 мавсумигача чўзилиб кетиши «қабул қилиб бўлмас ҳолат» бўлишини айтган.

Эслатиб ўтамиз, ўтган ҳафта «Манчестер Сити» АПЛ молиявий қоидаларини бузиш билан боғлиқ айбловларнинг деярли барчаси бўйича айбдор деб топилгани, фақат битта айблов истисно бўлгани ҳақида хабарлар тарқалган эди.

2023 йил февраль ойида Премьер-лига «Сити»ни 2009–2018 йиллар оралиғида молиявий қоидаларни 115 марта бузганликда айблаган. Кейинроқ The Times амалда гап 115 эмас, балки 130 та қоидабузарлик ҳақида кетаётганини маълум қилди. Премьер-лига айбловларни илк бор эълон қилган пайтда айрим қоидаларни ҳисоблашда чалкашлик юзага келган.

«Манчестер Сити» айблов қарори устидан расман апелляция бериш учун жума кунига қадар вақтга эга.

Жорий мавсумда кучга кирган Премьер-лиганинг янги қоидаларига кўра, апелляция жараёни 12 ҳафта ичида якунланиши, якуний хулосалар эса сўнгги эшитувдан кейин 30 кун ичида эълон қилиниши керак.

Бироқ «Сити» ҳуқуқшунослари ушбу муддатлар бу ишга татбиқ этилмаслиги кераклигини таъкидлаши мумкин. Сабаби, молиявий қоидабузарликлар бўйича иш янги қоидалар кучга киришидан олдинёқ кўриб чиқила бошланган.