Миср терма жамоаси бош мураббийи Ҳуссам Ҳассан 18 ёшли ҳужумчи Ҳамза Абдулкаримнинг «Барселона» ва миллий жамоадаги жадал ўсишини юқори баҳолади.

Абделкарим Африка миллатлар кубоги саралаш босқичида Жанубий Суданга қарши кечаги учрашувда Миср асосий терма жамоасидаги илк голини урди. Шу билан бирга, у миллий жамоа тарихида гол урган учинчи энг ёш футболчига айланди.

«Бу йил Ҳамзани Миср терма жамоасига чақириш осон қарор бўлмаган, чунки у “Барселона”нинг асосий жамоасида ўйнамаётган эди.

Худога шукр, у терма жамоага қўшилганидан кейин клубида ҳам унга эътибор қаратишди ва асосий таркибга кўтарилди. Натижада у ўйин амалиётига эга бўлди.

“Барселона”да ўйнайдиган футболчимиз борлиги биз учун, Африка, араб олами ва Миср футболи учун катта фахр.

Худога шукр, биз ҳам бу жараёнда муҳим роль ўйнадик. Шунинг учун уни жамоада сақлаб қолиш, босқичма-босқич ривожлантириш ва жамоадошлари билан бирга тажриба тўплашига имконият беришда қатъий турдик.

Мен унга ишонаман. Уни терма жамоага чақириб, жаҳон чемпионатига олиб борганим ҳам шу ишончимдан далолат. Худо хоҳласа, у янада кучли футболчига айланади ва “Барселона”да ҳам ўзини намоён қилади», — деди Ҳуссам Хассан.