«Реал» ҳужумчиси Килиан Мбаппе чоршанба куни кечқурун Париждаги тунги клублардан бирида севгилиси, актриса Эстер Экспосито билан бирга кўриниш берди.

RMC Sport хабарига кўра, бу воқеа Испанияда ва ижтимоий тармоқларда катта муҳокамага сабаб бўлган. Аввалроқ футболчи Миллатлар лигасида Туркияга қарши ўтган ва 0:1 ҳисобида якунланган учрашувда олган жароҳати туфайли Франция терма жамоаси қароргоҳини тарк этишга мажбур бўлган эди.

Ўтган мавсум охирида, жароҳатдан тикланиш даврида Экспосито билан Сардинияга қилган сафари учун танқидларга учраган «Реал» ҳужумчиси яна эътибор марказида қолди. Бу сафар бунга унинг испаниялик севгилиси билан Париждаги Boum Boum тунги клубига боргани сабаб бўлди.

«Реал» Мбаппенинг қанча муддат майдонга туша олмаслиги ҳақида расмий маълумот бермаган бўлса-да, Испания матбуоти унинг тикланиши 10 кундан икки ҳафтагача давом этиши мумкинлигини ёзмоқда.

Шу билан бирга, 27 ёшли ҳужумчининг хатти-ҳаракатлари саволлар туғдирмоқда. El Chiringuito дастури маълумотига кўра, Мбаппе тикланиш жараёнини давом эттириш учун «сўнгги икки кун давомида Вальдебебасдаги базага келмаган».

«Бу жумбоқ. У Франциядан жароҳат билан қайтди, аммо ўзи тўп тепадиган шаҳарда даволанмаяпти», — деди студияда иштирок этган испаниялик журналист Маркос Бенито.