"Ювентус" "Марсель" ярим ҳимоячиси Пьер-Эмиль Хёйбьергни қишки трансфер ойнаси учун устувор вариантлардан бири сифатида кўриб чиқмоқда. Бу ҳақда La Gazzetta dello Sport хабар берди.
31 ёшли даниялик футболчи бир неча ҳафта аввал "Марсель"ни тарк этишга яқин эди, аммо кутилмаганда "Ньюкасл"га ўтишдан бош тортди ва Франция клубида қолишга қарор қилди.
Бу қарор "Марсель" эгаси Фрэнк Маккортнинг норозилигига сабаб бўлган. У футболчини сотиш орқали клубнинг молиявий аҳволини яхшилашни режалаштирган эди.
Жорий мавсумда Хёйбьерг "Марсель" сафида олтита учрашувда майдонга тушди. У барча баҳсларни асосий таркибда бошлади ва битта гол урди.
"Ювентус" тажрибали ярим ҳимоячи излаётгани сабаб Хёйбьергни Турин клубига ўтишга кўндиришга умид қилмоқда.
"Фиорентина" ҳам даниялик футболчига қизиқиш билдирмоқда ва трансфер учун "Ювентус"га рақобатчи бўлиши мумкин.
