Собиқ футболчи Гари Невилл "Манчестер Сити" жиддий молиявий қоидабузарликларда айбдор деб топилганидан сўнг вазиятга муносабат билдирди.
Невилл Англия футболи келажагидан хавотир билдирди ва ҳозирги вазиятни 2006 йилда Италияда юз берган "Кальчополи" можаросининг оқибатлари билан таққослади.
"Италия футболи сўнгги 25 йил ичида жуда катта зарар кўрди. Биз доимо Англия Премьер-лигасини стандартларни белгилаб берувчи чемпионат деб ҳисоблардик, коррупция, фирибгарлик, допинг, келишилган ўйинлар ва ҳакамлар билан боғлиқ можаролар эса бошқа лигаларда содир бўлади, деб ўйлардик.
Энди эса бу бизнинг мамлакатимиз ва лигамизга ҳам етиб келди. Ҳозир бизни лойга ботиришмоқда", — деди Невилл The Overlap дастурида.
Невиллнинг фикрича, очколарни олиб ташлаш ёки титуллардан маҳрум қилишнинг ўзи етарли жазо бўлмайди.
"Ягона адолатли жазо клуб эгаларини четлатиш бўларди. Улар айбдор деб топилган саноат миқёсидаги молиявий допингдан ҳам жиддийроқ нима бўлиши мумкин?" — деди у.
"Манчестер Сити" эса айбловларни рад этишда давом этмоқда ва қарор устидан шикоят қилмоқчи. Клуб апелляцияни жума кунига қадар расман топшириши керак.
