Sobiq futbolchi Gari Nevill "Manchester Siti" jiddiy moliyaviy qoidabuzarliklarda aybdor deb topilganidan so‘ng vaziyatga munosabat bildirdi.

Nevill Angliya futboli kelajagidan xavotir bildirdi va hozirgi vaziyatni 2006 yilda Italiyada yuz bergan "Kalchopoli" mojarosining oqibatlari bilan taqqosladi.

"Italiya futboli so‘nggi 25 yil ichida juda katta zarar ko‘rdi. Biz doimo Angliya Premyer-ligasini standartlarni belgilab beruvchi chempionat deb hisoblardik, korrupsiya, firibgarlik, doping, kelishilgan o‘yinlar va hakamlar bilan bog‘liq mojarolar esa boshqa ligalarda sodir bo‘ladi, deb o‘ylardik.

Endi esa bu bizning mamlakatimiz va ligamizga ham yetib keldi. Hozir bizni loyga botirishmoqda", — dedi Nevill The Overlap dasturida.

Nevillning fikricha, ochkolarni olib tashlash yoki titullardan mahrum qilishning o‘zi yetarli jazo bo‘lmaydi.

"Yagona adolatli jazo klub egalarini chetlatish bo‘lardi. Ular aybdor deb topilgan sanoat miqyosidagi moliyaviy dopingdan ham jiddiyroq nima bo‘lishi mumkin?" — dedi u.

"Manchester Siti" esa ayblovlarni rad etishda davom etmoqda va qaror ustidan shikoyat qilmoqchi. Klub apellyasiyani juma kuniga qadar rasman topshirishi kerak.